{ LIFESTYLE }
26 Feb 2021
黄貫中朱茵拍片賀元宵 讚老婆夠「大」被罰頂痰罐

適逢元宵佳節(2月26日),恩愛夫妻黃貫中(Paul)和朱茵合體挑戰「愛情五秒定律」,除了互數對方身體「最大」之處,又無底線盡情放閃當眾獻吻;夫婦二人更借遊戲分享相處之道,寄語有情人時刻常存感恩、珍惜緣分。日前黄氏夫婦特地合體,接受「愛情五秒定律」測試,Paul被問到老婆激嬲自己的三個原因,隨即「機關槍式」搞笑謂:「天氣凍著唔夠衫、肚餓又唔食嘢、亂放雜物、唔願起身、遲到⋯⋯咦,原來可以講到咁多。」令朱茵笑言要罰對方頂痰罐!他又笑指老婆身上三個最大的地方,就是「眼大、嘴大和志氣大」,朱茵全程合不攏嘴。


談到老公婚前婚後的不同之處,朱茵便趁機投訴:「以前出街一定會拖實我,依家就會拖阿囡(黄鶯);仲有以前唔會窒我,結婚後就係咁窒。」不過講到Paul具備的三個好老公條件,她就甜絲絲地表示:「大力、任我差遣,而且會煮飯俾我食。」一旁的Paul聞言即時反擊:「講緊好老公條件,唔係揀工人喎。」最終朱茵於賽事中落敗,並向Paul獻上香吻作為元宵禮物,羨煞全場!

相愛超過廿載,Paul和朱茵至今仍然恩愛非常,Paul不諱言經常有人向他取經:「好多人問我哋,一齊咁多年會唔會悶,講真話唔悶就呃你,但係要學習點樣避免呢種悶,最重要唔好有一個奉旨嘅心態,例如太太為你煮飯,你要識得欣賞,要覺得每一餐飯都係第一次,將呢個心態套用喺所有事情上,就唔會覺得悶,反而好新鮮。」朱茵也建議一眾有情人,為生活加添情趣,有助增進感情:「尤其依家喺屋企嘅時間多咗,可以嘗試多啲唔同嘅嘢,最近我哋會等囡囡瞓覺後,一齊砌3D模型,都幾好玩㗎,同埋我哋晚晚都會睇戲。」


雖然因為育兒理念不同偶有爭執,但夫婦二人都會主動認錯,「愛妻號」Paul更自有一套「爭吵哲學」:「吵架輸咗,固然係輸;贏咗你都有排捱!既然輸贏都係處於輸家嘅狀態,奉勸各位男士最好就唔好同另一半嘈,係咪都認錯先。」

News
Feature
Blog
Load more
 
NOTIFICATION